冇見一排嘅前財爺薯片叔曾俊華，噚日現身時代廣場，為鳳冠師傅陳國源嘅展覽做開幕嘉賓。近排熱廚房高度升溫，無官一身輕嘅薯片叔卻風騷不已，喺活動上大講武德，語帶雙關話做人除咗要「好打得」，仲要有武德，即係忠義仁勇、尊師重道等等，而且最重要「虛心求教」，唔通隔空向前同事、特首林鄭放話？ 薯片叔仲借成名多年嘅陳國源師傅，年輕時得到師母贊助30大元創業，以及漢朝大將韓信都係因為一飯之恩而成大器為例子，勸勉成年人畀多啲機會年輕人，唔知薯片叔呢番話，一眾AO後輩、尤其擔任選舉主任嗰幾位，會唔會特別有感受？