今時今日嘅香港，就係宣誓時講粗口會被DQ、學生講粗口會被停學，不過建制派講就冇事嘅。噚日公民黨陳淑莊喺內會提出，就東區民主派區議員被黑衣人阻止開會件事提出急切質詢，工聯會黃國健為咗護盟友，竟然話區議會嘅問題「關你立法會嘟事呀！」
陳淑莊話民政署覆咗佢，解釋當日阻住民主派區議員開會嗰4位只係保安，而區議員作為公職人員，唔畀佢哋開會係涉嫌犯法，所以一定要跟進。建制派反對都預咗㗎喇，不過身為東區區議員嘅工聯會郭偉強，竟然話因補選臨近，所以民主派「自製新聞」，仲話當日有人講過「流會咪流會咯」，呢個時候黃國健又加把口，話東區件事係「政治表演」，怕且東區區議會啲人聽到立會咁樣搞會心諗「關你立法會嘟事呀！」。工聯會咁嘅反應，莫非真係怕件事會影響建制派喺補選選情？