啱啱周三（1月31日）谷草夜馬，冠軍騎師雷神莫雷拉連場失威，五度做二奶（跑第二），但最後都以30分做騎師王，以咁樣形式封王，堂堂當今香港馬壇頭號人物，可能有失面子。
不過嚟緊周日（4日）沙田賽事，如此尷尬局面，應該唔會再出現於雷神身上，事關今期雷神胯下惡馬如雲，包括「達羅素」、「放馬過來」、「平海福星」、「勇闖者」及「天下為攻」等，起碼坐位望贏，相信雷神要作個人show time完全唔係難事。
其中列陣第九場三班草地1200米嘅「天下為攻」，雖然今仗為自上年7月16日贏馬後首戰，休息足足超過半年，但廐主蔡約翰對此匹明星馬部署小心翼翼，期間試過四課大閘，近兩次大閘更是全勝始安排復出，備戰絕對一絲不苟。
「天下為攻」上季已露過一手，陣上可擊敗新灰色神獸「五十五十」，今季「五十五十」6戰4冠1亞1季，並貴為新鮮滾熱辣的董事盃亞軍，已加到121分。
以此推算，「天下為攻」明顯是準頂班馬無疑，現時僅75分，睇怕至少超兩班，加上抽3檔靚位，就算久休初出，照計亦夠殺有餘。