左丁山家族如果全部同枱飲茶，在港居住者全部到齊嘅話，有四代共23人，成年人之中，有6個中大新亞校友，5個浸會（當時未係大學）學院校友，堪稱勢均力敵。論對母校之參與程度，就好似中大校友多啲噃，因為中大校友會，新亞校友會嘅平時及定期活動多籮籮，但家中校友對浸大之活動就好似並不熟悉，參與度比較低，而有兩位係理工及港大校友，佢地同樣唔清楚理工、港大有乜校友活動，甚至有啲陌生感。
於是就浸大普通話事件，問番家中浸大校友，佢地都話，必修普通話似係新生事物，佢地畢業時未有呢樣嘢，於是上網搵料：「眾新聞」網頁有專題報導，指浸大生必修普通話，係源於2003年有僱主投訴浸大生之普通話能力不佳，於是引入「普通話必修」，經學生提意見後，又有「豁免試」，即參加測驗及格者，可以免修三個學分普通話。在大學學習多一種語言，對學生有利無害，原則上不應反對，但所有大學生心理上都會反對必修嘅，因「必修科」唔及格，就不能畢業，好驚㗎！昔年新亞經濟系學生必修會計，肥佬不能畢業，本來經濟系學生讀會計，幾有邏輯，絕大部份學生無異議，偏偏有一年一位數學成績上佳嘅學生連修兩年會計都肥佬，第三年重修，驚到有心理負擔，成班同學向會計學講師陳情，又同呢位同學補習，先至「僅僅及格」，可以領畢業證書（按：呢位同學後來成為大公司CEO）。
學生反對必修，人之常情，睇番浸大普通話之「豁免試」，聽講及格率偏低，絕大部份學生都不能豁免，要修讀三個學分普通話。「豁免試」程度如何？據眾新聞引述中文大學社會學講師黎明博士（原籍上海，來港讀大學）之言，即使係大陸學生，要在豁免試第三部分（臨時發言）及格，都會有困難，香港學生更難pass，難怪豁免試及格率偏低。將豁免試弄得程度過高（崔世安肥梗，張建宗都唔會及格），無非係為浸大語文中心增加多啲普通話班學生啫，否則語文中心內之普通話教師豈非無工可做？講到尾，原來係大家搵食啫，得啖笑，演變成人民日報高呼用霹靂手段，更加不知所謂。
浸大學生其實唔駛咁緊張，必修咪必修囉，擔保普通話考試一定及格，三個學分唾手可得。語文中心老師邊度敢肥學生呀？如有三成浸大學生因普通話肥佬而畢唔到業，UGC唔肯過浸大呀！