美國一班國會議員聯名提名雙學三子同整場雨傘運動，角逐2018年諾貝爾和平獎，呢單嘢自然觸動北京神經，香港班建制派亦開足馬力砌，不過砌人都要有啲水平，好似民建聯陳恒鑌咁，將諾貝爾叫做「諾先生」，結果砌人唔成，反成網民笑柄。
網民：米高積遜姓米？
話說陳恒鑌噚日係fb分享三子獲提名諾貝爾獎報道，仲留言話係對諾貝爾嘅侮辱，跟住佢寫咗句：「如果"諾先生"（Alfred Nobel）還在生，一定會被激到噴血並即時取消和平獎！」陳恒鑌話晒叫做香港科大畢業，唔通唔知諾貝爾（Nobel）係姓氏？呢個帖一出即俾網民廣傳，有人恥笑民建聯繼創造「北極有企鵝」生態奇蹟後，竟然連歷史名人個姓都可改寫！有網民嘲諷，如果諾貝爾叫「諾先生」，「米高積遜是否姓米？甘迺迪是否姓甘？」
陳恒鑌自知衰咗，噚晚係fb再貼一條「陳恒鑌訪問諾生」短片，片中扮諾貝爾嘅人，叫陳恒鑌唔好叫佢做諾生，叫番佢做諾貝爾，陳仲加埋hashtag#認真你便輸了#請勿轉移焦點，不過網民繼續笑佢，話佢已經衰咗，點兜都兜唔番！