九巴又捐巴士喇！噚日佢哋捐咗一部退役巴士畀元朗錦田通德學校，希望幫助同學仔提升學習興趣，而今次已經係九巴第四次捐出退役巴士畀社區。今次捐出嘅巴士型號係丹尼士三鋒（車身長10.6米），外觀保持良好。呢架退役巴士會重新改裝，變成閱讀巴士，仲改咗個新名叫「KMB: Kids Miraculous Bus」，校方計劃喺車窗及天花加上繪本嘅人物圖案，並擺放不同類型書籍，希望提供良好環境培養學生閱讀習慣，擴闊視野。
校長黃偉立感謝九巴透過改裝舊巴士，俾學生有閱讀同學習嘅地方，因為學校好注重閱讀，但一直因為空間不足難以推動。九巴採購部主管林肖連就話好高興退役巴士都可以繼續服務香港市民，此舉亦可達致資源循環再用，持續發展。