相信唔少球迷都會睇過，足壇球星被日本電視台邀請，接受各樣考驗佢地技術嘅挑戰，當今球王美斯當然亦唔例外。近日，網上一段有關美斯參加日本電視節目嘅片段流出，美斯需要喺100秒之內，射破「九宮格」嘅進化版——「廿宮格」。
剛開始時美斯一直運用左腳，主攻龍門框左邊的格數，先後射破「12」、「2」、「6」、「16」、「11」等格數，僅用30秒就已經射爆一半「格仔」，似乎呢個挑戰對美斯嚟講易如反掌。
不過球王都會有腳軟嘅時候，其後30秒嘅命中率似乎有所下降，唔係出界就射中「格仔框」；或者呢種叫做節目效果，美斯刻意製造緊張氣氛，喺最後嘅15秒內先後5次起腳，先至射中最後一個、位處龍門框右上角的「5」號格，最終成功喺100秒內完成「廿宮格」挑戰，仲淨低7.77秒。
據了解，呢個「廿宮格」有唔少日本國腳都挑戰過，包括吉田麻也、森重真人、太田宏介等都唔能夠係100秒內完成。筆者就覺得美斯射得都算準，未知該日本電視台，會唔會邀請埋另一球王基斯坦奴朗拿度，挑戰一下美斯嘅時間呢？或者日本罰球王中村俊輔，可能有力一戰。