沒有你，我們活得更好！經過動盪不安，阿仙奴終於喺周一將阿歷斯山齊士送走，不過山神其實係咪一早已經變咗瘟神？山齊士臨走前兵工廠先喺英超漂亮大勝，到周三英聯盃四強次回合，喺主場以2:1擊敗車路士，兩回合計以同樣比數殺入下月決賽，同曼城爭冠軍，隨時今季有錦標落袋，唔使為山神離隊咬牙切齒。
踏入2018年之後，阿仙奴戰績低迷，一月頭五場波都贏唔到，英聯盃四強首回合作客車路士就悶和收場。到上周六英超主場迎戰水晶宮，賽前雲格已經講明山神即將被賣走，場波即以4:1大勝。到周三英聯盃四強次回合主場迎戰車路士，成班阿仙奴球員鬥志十足，至於剛由曼聯加盟嘅米希達利恩，暫時未可以上陣，只係喺場邊睇波。
決賽硬撼曼城不被看好
車路士喺開賽七分鐘打開紀錄，柏度洛迪古斯傳畀夏薩特單刀搞掂。兵工廠喺五分鐘後就扳平，守將蒙利爾接應奧斯爾開出嘅角頭槌攻門，個波似波子機咁彈中馬高斯阿朗素同魯迪格個頭，好奇情咁出現咗呢個烏龍波。下半場15分鐘阿仙奴反超前，拿卡錫迪殺入禁區右路傳中省到人，由中場格列沙加快腳射入，為兵工廠奠定2:1勝局。
阿仙奴晉級，到下月25日會喺溫布萊球場上演嘅決賽，同曼城爭冠軍。曼城被足智彩列為1.38倍熱門，阿仙奴就被睇淡得2.8倍，不過一場過嘅決賽乜事情都有機會發生，爆冷贏到的話，就會係兵工廠喺五年嚟嘅第四項錦標，對雲格嚟講好重要，要證明隊波冇話冇咗邊個唔掂。
雲格賽後讚球員今場贏心態：「上半場我哋有啲怯，好在易邊後已經修正番，好開心兵工廠球迷又可以去溫布萊捧我哋場。」另外，阿仙奴球迷電視拍攝場波嘅時候，影到疑似李斯特城中場馬列斯，隨即令廠迷無限想像，估佢有機會會喺轉會窗關閉前轉投阿仙奴。
球迷柴台 干地怨唔夠人
雲格開心，呢邊車路士主帥干地就憂心。車仔近排戰績一般，已經有球迷向佢展示下台標語。今場波車仔已經有艾華路莫拉達同法比加斯受傷缺陣，再有韋利安喺上半場受傷退下火線。車仔喺一月收購咗中場巴克里，後者亦喺今仗首次上陣，但干地賽後仍然抱怨唔夠人用：「自季前開始，球會決定晒所有球員買賣，好明顯我喺球員轉會市場上係冇話事權。當陣容人手不足喺輪換上就有問題，搞到我冇覺好瞓。」