【《add》專訪】25歲新生代男星胡子彤由港隊棒球員變演員，去年憑《點五步》得到金像獎最佳新演員，半隻腳叉入娛圈。2018年，將50/50運動演戲的比例，調到「放演員工作喺第一位」，胡子彤目標定在成為香港版「黑人」陳建州，「我唔怕失敗，最想俾人睇到我有努力過、有付出過」鬥志旺盛！
採訪：林妙萍
攝影：郭賢興
化妝：Bon Bon of MOD_makeupacademy
髮型：Anson of Orient4
服裝提供：Valentino（VLTN）
場地提供：天穴
對比台灣、內地，香港年輕新生代男演員的確特別少，幸好去年一下子冒出了好幾個，當中包括比較亮眼的他：胡子彤。
由棒球手變新演員，25歲胡子彤絕對不是小鮮肉型靚仔格，粗眉大眼有點桀驁不馴，更藏住一份倔強的個性臉，辨識度的確較高，「我呢個類型嘅男新人相對比較少，對自己都有啲信心，要相信自己得，你先會成功！」
忘記新演員獎
《點五步》後機會比人多，簽經理人公司，片約、廣告湧住到，客串《白色女孩》、正在上映的《我的情敵女婿》、港台劇《沒有牆的世界VI》演聾人美式足球運動員，還有古天樂、劉青雲主演的《明日戰記》，幸運之門已經打開。「好好彩，遇到嘅對手全部都係影帝級，秋生哥、君豪哥、紅姐（惠英紅）、嘉玲姐好多。知道自己有幾好彩，一定要把握，好似同門兄弟軒仔所講，『作為一個後輩，努力去做，就係對前輩最大的尊重。』演員我係啱啱起步，未來十年，叫做黃金成長期，所以呢段時間，我乜都想做。」
目標清晰，立下決心做演員，胡子軒坦言絕非因獎項光環，「要將呢個獎撤除，因為已經過咗去，新一年《金像獎》又嚟啦。入行第二年，係因為工作畀到我一個成功感，一個好想繼續進步嘅目標。」
覷覦港亞洲盃
新人多多，叫胡子彤自評優點，「最直接我係運動員性格，好清楚一定要付出，要堅持。」運動員鬥志、紀律以外，原來無視也是一種磨練，「加上棒球呢種運動，習慣咗俾人無視、忽略，可能我由細到大已經習慣呢件事，所以我係一個完全不怕失敗、完全唔怕做得差嘅人，我寧願你話我知有幾差，咁我先可以進步。」暫定目標是同樣由運動員升格演員的台灣男星陳建州，人生偶像是成長為劉青雲、謝君豪「好calm、好專注演戲，喺片場外亦係一個好好先生。」
由小學開始，籃球、足球、長跑，所有運動都喜歡，中學主攻棒球後，熱血依然長流心中，「8月印尼亞運，同埋香港第一次搞嘅亞洲盃，呢個係今年最重要的比賽。呢一刻，係咪運動員生涯最後兩個比賽呢，我都唔清楚，盡可能付出先。」
自信型男
Valentino 2018早春VLTN男裝系列，將在ifc舉行pop up store，主帥Pierpaolo Piccioli環繞運動服變革，珠飾track suit、另類運動裝，年輕革新。「我好鍾意運動衫，舒服就OK，都係自己買。我絕對唔係跟潮流嘅人，應該有少少逆潮流，因為我真係跟唔到。」
問誰是心中打扮有型的人？胡子彤苦思十多秒仍想不到一個名字，「我覺得自信係最緊要，有自信，白tee、牛仔褲都可以好有型。」。
更多精采時尚內容，盡在 http://add.appledaily.com。