香港街馬下月25號喺啟德郵輪碼頭空地舉辦嘉年華，特登邀請深水埗見光墟多個檔主，喺現場售賣多款小食，重現街頭飲食文化。賣涼拌雲耳、雞翼尖嘅思伶係單親媽媽，上次農曆新年喺墟市擺檔反應唔錯，今次再接再厲，每份小食賣20蚊。
有申領綜援同做清潔工兼職嘅思伶話，兼職月入得一千蚊，生活捉襟見肘。上次墟市賺得到嘅錢，已為剛升中嘅仔仔換電腦，而仔仔最近加入咗游泳校隊，暑假將去台灣集訓，希望今次可為仔仔賺取兩千幾蚊旅費。而60歲嘅靚姐到時亦會擺檔，賣足料暖身雞湯，每碗30蚊。靚姐為照顧患病丈夫，即使受腳患困擾，仍堅持到見光墟賣湯。另一檔主62歲琼姨就會賣自製斑蘭糯米糍，幫補一家三口。
街馬每張50蚊嘅門券喺街馬網頁有售，扣除成本後門券收益將捐助非牟利機構。