連續第4年舉行嘅「扶輪香港超級馬拉松2018」今年3月4日喺中環龍和道舉行，新增「6小時耐力賽」。扶輪香港超級馬拉松2018籌備委員會主席翟慶聰話，參加嘅跑手喺6個鐘頭內不設距離上限咁跑，其實好考跑手耐力同自我挑戰。𠵱家有30幾個男跑手和10個女跑手參加「6小時耐力賽」，最終跑手可以跑到幾遠，佢都好期待咁話。
翟慶聰又話，一般馬拉松全長為42.195公里，但超級馬拉松係50公里，今年有約1,400人報名參加，同舊年差不多。早前渣馬有跑手猝死，佢就話超級馬拉松同醫療輔助隊合作，當中有經驗嘅醫生駐場，加上賽道係不斷跑圈方式進行，每圈長兩公里，意外發生時容易處理。為了跑手安全，今年將增加急救站至4個。跑手雖然唔使提交醫療證明健康狀況，但佢都呼籲跑手重視自己安全，要留意身體狀況。