馬場內碰到退休傳媒人C總，佢以前周圍去，腳毛遍全國，對內地人事認識之清楚，遠遠超過左丁山幾百倍。退休後就鍾意出入馬場，再不理會時事。呢日同佢在沙圈睇完老友隻馬，覺得幾難有機會贏，同佢講番一位新聞人物八卦。C總話：「嗰位阿哥以前好無禮貌嘅，對上大人，貴人就十分謙卑，對我嘅舊部，常有面色畀你睇，一位記者去辦公室訪問佢，佢一邊聽問題，一邊剪指甲，我個記者覺得好委屈。」左丁山聽到幾乎笑死，對C總講：「咁你地有冇寫衰佢！」C總話：「點敢呀？上頭嘅上頭話要同佢講好說話呀！」
C總有好多趣聞怪事，唔寫一本回憶錄真係可惜。之不過，香港不同美國，美國記者或白宮官員，一旦離開，就寫書大爆白宮秘聞，全未負上法律責任，喺香港寫同一類書，或者會惹上麻煩都唔定，美國言論自由有憲法保護，總統想告作者係好難嘅。香港就除咗訴訟嚇怕作者之外，還有惡爺呢！
嗰位阿哥風騷時對住記者剪指甲，現在大把時間日剪夜剪啦，不講為妙。睇見林順潮教授搞間眼科醫院上市，眨吓眼已成為百億富豪（起碼紙上富貴先），要搵真銀，駛乜搞咁多國際關係，周遊列國吖。
跟住碰到一位青年財俊，C總識得佢阿爸，順便介紹畀左丁山認識。呢位青年財俊好醒目，到美國名校讀飽書先至返嚟加入阿爸嘅公司做董事，講生意之道，已經好精通，假以時日，係家族公司接班人無疑，睇吓佢張咭片，係某省某市政協，不禁望多佢兩眼，再問：「你係某省人士？」財俊答：「唔係，我係潮州人。」潮州專發大富豪，李嘉誠人所共知，泰國盤谷銀行家族亦然，醫生有位林順潮剛剛榮陞百億富豪，演藝製作界名人蕭潮順，他日可能亦有機會，個名靚仔吖嘛。潮州財俊何以去某省某市做政協？佢答：「左先生，你實知嘅。我地新一代要做廣東政協或上海北京政協之類，捐錢都要排隊呀，我年紀輕，排隊捐錢都未有資格，唔駛望。咪逐步嚟囉，到一啲較偏遠省市，做政協較為容易，我得32歲啫，大把時間慢慢升呢！」真係佩服佢父親睇得咁長遠，盡早栽培，唔怪得啲大家族第一代第二代已紛紛爭取第三代上位，到內地鑽營。呢位財俊不愧係美國東岸名校學生，佢話大市場在中國，同鄉林順潮都係靠中國概念榮升富豪嘅咋！有個甚麼政協名銜，在內地行走總係比較方便一啲，做到人大代表如林教授就更加。