韓劇有人喜歡有人就嫌老土，而韓劇情節都有唔少令人嘔血嘅情節，就連韓國觀眾自己都嫌騎呢。
近日韓國一個調查機構就進行咗「韓劇中最荒誕一幕」嘅投票選舉，當中有近6千人參與調查，最終韓國觀眾就揀咗2013年播出嘅MBC劇集《歐若拉公主》，劇情講到男主角想放棄癌症治療，喺劇中就講咗句「癌細胞亦係生命」，當中呢個台詞就獲得逾千得票，以17%得票率登上榜首。
同樣由《歐若拉公主》嘅編劇林成漢編寫、於2011年開播嘅《新妓生傳》，劇中登場人物被靈魂附體，雙眼忽然射出綠色鐳射嘅場面就被觀眾選為亞軍；而SBS經典劇集《巴黎戀人》於2004年播出時大受歡迎，點知結局卻令人大感意外，女主角遇到嘅一切都係夢境，令唔少劇迷炮轟結局爛尾，《巴黎戀人》以9%嘅得票率被選為季軍。
而其他上榜嘅場面，仲包括SBS劇集《天啊》中角色竟然睇睇吓搞笑節目而突然死咗；SBS嘅《妻子的誘惑》中角色臉咗個痣就竟然冇人認得佢；還有去年播出嘅人氣劇《我的黃金光輝人生》，現時仍熱播嘅《我的黃金光輝人生》雖然曾獲得43.2%嘅最高收視，但劇中卻有角色因為心理病而被稱患上癌症「想像癌」，仲令「想像癌」成為搜尋網嘅熱門字。