隨住新一輪DQ潮來勢洶洶，有政圈中人慨嘆，若然姚松炎同周庭真係被無理DQ，今次立法會補選，無可避免將白鴿黨化同區議會化，反映不論大家是否認同白鴿黨同區佬嘅理念，佢哋都係選舉時嘅重要支柱。
被指刻意佈局 大呼冤枉
點解咁講？因為到時可能出現嘅選舉格局，就係香港島補選，會由香港眾志周庭嘅Plan B、前白鴿黨南區區議員區諾軒，大戰同區區議員、新民黨陳家珮。九龍西補選方面，則由姚松炎嘅Plan B、白鴿黨深水埗區議員袁海文，決戰同民記同區區議員鄭泳舜。新界東補選方面，則會由前白鴿黨西貢區議員、新民主同盟范國威，硬撼同區區議員方國珊，其他對手仲有離島區議員、工聯會鄧家彪，以及沙田區議員陳國強。
單係睇地區直選，已經有成8個區議員參選，而3區嘅民主派主將，唔係現任白鴿黨人，就係前白鴿黨員，可以話今次補選唔係區議員大戰，就係前/現任白鴿黨員大戰建制派。
呢個咁奇嘅對戰局面，自然引來政圈唔少好事之徒議論，仲有怪論質疑唔知係咪白鴿黨搞出嚟？有白鴿黨人就大呼冤枉！白鴿黨根本無可能預知邊個勝出民主派嘅初選，更冇可能估到一向積極爭取出選嘅民協馮檢基，會突然宣佈唔做Plan B，又話諗得出呢場咁黐線、咁違反選民意願嘅補選戲碼，只有北京政府嘅強硬派，唔好有乜都賴落白鴿黨度先得㗎。
李八方