《金田一少年事件簿》到今時今日都仲係經典，日本漫畫刊物《Evening》今期開始重新連載全新故事《金田一37歲之事件簿》，係講述20年後，即係金田一一已經37歲嘅新一章，不過當年開口埋口話「以爺爺的名譽發誓」、「兇手就在我們之中」等經典對白可能已經唔再出現，人到中年嘅金田一更表示：「已經不想再追查真相！」而女主角七瀨美雪同金田一目前關係都令fans相當關心，網民更希望可以請來最經典嘅拍檔堂本剛、友坂理惠再合作演繹全新真人版，而堂本剛4月就滿39歲，其實同原著年紀唔差好遠，只係外型同當年相差太遠。
《金田一》當年大受歡迎，更先後有小說、動畫、連續劇、電玩等應市，尤其1995及1996年嘅日劇版可謂風靡全亞洲，令主角堂本剛、友坂理惠上位成當紅偶像，之後再分別起用松本潤、龜梨和也、山田涼介接棒成金田一，但始終都唔及堂本剛深入民心。