皇家馬德里周三晚喺西班牙盃半準決賽次回合以1:2不敵雷加利斯，爆咗個12.5倍大冷W兩回合計雖然踢成2:2，但因為作客入球條例遭淘汰。銀河艦隊教練施丹（圖）賽後話要為落敗負上全部責任，又承認自己嘅前途肯定會同歐聯16強鬥巴黎聖日耳門嘅命運「掛勾」。
施丹話：「賽果係合理嘅，因為對方踢出咗部署，我哋就冇。呢啲係我嘅責任，我真係好失望。我唔會嬲我啲球員，佢哋乜都做晒，或者佢哋踢得唔好，要承擔一啲責任，但我先係需要負全責嗰個。」
C朗巴利要唞唞
佢又講：「可能每個球員都冇踢出正常嘅水平，呢啲就係足球，球員狀態有起有落，我哋下半場表現好好多，製造咗入球機會。」施丹亦為呢場波收起基斯坦奴朗拿度（C朗）同加里夫巴利嘅決定作出解釋，佢話：「有啲球員需要休息。家陣我要搵個解決辦法，繼續戰鬥落去，試吓改善球隊。」