眼鏡鏡片變示愛玻璃窗、朱古力火鍋變大浴場，縮水世界最近入侵香港同大家，事關有商場邀請喺IG坐擁百萬粉絲嘅日本微型藝術家田中達也來港，為第9年舉行嘅朱古力展助陣，田中話作品最重要係觀眾一睇就知物品本身係乜，所以用朱古力同日常用品設計咗32個獨一無二嘅模型，雖然模型細細，但都用咗足足2個月先完成。
同場聽倒模黑膠碟
除咗睇，海港城請咗法籍藝術家Julia Drouhin示範用朱古力整黑膠碟，透過倒模將黑膠碟紋理印上朱古力，擺上留聲機就可以聽到同黑膠碟音樂，但每隻播5次就要報銷啦！海港城美術館會每日免費開放畀大家參觀同感受朱古力樂韻。
同期仲有朱古力品嚐家Katie Chan引入首次攻港嘅9個地方朱古力品牌，買240蚊12張票券嘅電子通行證去「朱古力tasting bar」，先可以品嚐到厄瓜多爾極罕To'ak朱古力、英國豉油焦糖軟心朱古力等名貴朱古力。整個朱古力活動即日起至2月25日舉行。