上星期六在馬場，隔籬一張枱來了五六個年約三十歲左右嘅年輕人，全部以英語交談，一聽美式口音就估到佢地係留學美國回來，而且係出身國際學校嘅香港新一代，呢類人在中環見得最多，喺馬場就比較少，正是馬會希望吸收嘅新馬迷。但佢地或者只係嚟見識吓啫，聽佢地談話，就知道佢地連賠率矩陣都未睇得明，正牌初哥也。
另一邊廂，肥仔K與朋友去咗五樓一個廂房，話唔知有乜開春會員優惠喎，四個人自助餐減收兩百元，佢參加埋貼士比賽遊戲，得第三名，再贏得兩百元餐券，但遺憾嘅係，佢掛住填比賽表格，教埋朋友點樣填飛買位置Q等等，自己趕唔切真係落注，結果參賽貼士真係中晒，自己冇錢收。如果唔係上一個星期三（1月10日）佢在第七第八場連中「威信」、「駿明珍寶」兩隻馬獨贏，贏到笑口盈盈嘅話，佢一定㷫到拍枱。
問佢點解重注威信獨贏，佢話：「上次威信贏咗，有一位老人家坐輪椅，多人跟隨左右，到沙圈拉頭馬，練馬師沈集成踎低同佢影相，顯得非常尊重，我問你嗰位馬主係邊一位，你話係曹光彪先生，九十七歲，紡織界大人物，港龍航空創辦人，長子係曹其鏞。我第一份工係賣電視嘅，曾親自押送巨型電視到曹其鏞先生大宅，監督安裝。嗰晚隻『威信』睇嚟狀態好勇，心諗沈集成必定為大老闆繼續搏命，唔敢怠慢嘅，而且賠率竟然有11倍，於是放膽落注，果然輕鬆贏馬。曹先生身穿厚衣，坐輪椅，膝頭以下用厚氈鋪蓋，影頭馬相，沈集成又試踎低。買馬有時要睇埋馬主係邊一位嘅！」
肥仔K輸得多，開始學曉賽馬要睇好多因素嘞，連馬主面子都要考慮埋，「行為經濟學」有時可以在馬圈應用，你估賭馬淨係刨賽績，睇晨操狀態，負磅，排位，騎師及沙圈踱步神色咁簡單咩！但有時呢，又係好簡單，簡單到人人忽略晒，故此賽馬就係咁過癮，次次新款，日日不同吖嘛。呢例如上星期三（1月10日）第六場跑三級賽一月盃，余伯樂特別來短訊叫左丁山睇佢貼士專欄，內裏講1號「鷹雄」跑慣級際賽，雖然成績一般，但畢竟有級數，而同場對手盡是一班尾、二班頭，只有一隻8號「中華盛世」，4歲未見底，故此「鷹雄」儼如鶴立雞群，Win硬。左丁山諗咗一輪，覺得余伯樂講得有道理，但臨場有9倍，大熱門係4號，可見得一眾馬迷都唔相信最簡單之事情，左丁山好少買馬贏得咁輕鬆，咁開心，要請番余伯樂到陸羽食麻蓉包至得。