呢段時間又係各省市政協換班嘅旺季，通常都有特邀名額預留畀港區人士「行埋」；八方聽聞新一屆北京市港區委員大換班，上榜嘅包括郭炳聯次子、新地執董郭基泓，呢位新地第三代近年喺政壇開始活躍，估唔到公職伸延至京城；有入自然有出，據聞長和系主席李嘉誠嘅次子李澤楷就喺今次卸任，其實小小超已出任幾屆北京市政協，都係時候講bye-bye。
楊政龍入局 呂麗君失寵
據知入局富二三代尚有楊受成二公子楊政龍。除咗商界，亦有政界新一代上位，最受矚目嘅當然係民建聯竟然打孖上，有指立法會議員劉國勳同深水埗區議員鄭泳舜都榜上有名，政途一直向北上。但可能大家更關注嘅係聖公會教省秘書長管浩鳴盛傳有份，如果諗吓佢係團結香港基金顧問，就知道佢就算獲推薦都唔令人意外。
至於離場嘅仲有華人置業劉鑾雄前女友呂麗君，其實呂麗君上屆先入局，短短一屆就要走人，似乎有啲權力同地位，同一啲身份係不可分割。計埋留任嘅信和集團黃永光、恒基地產李家誠、九倉吳宗權同郭鶴年千金郭惠光等，北京市政協續成富二三代樂園。但有政界中人就話，雖然北京市政協聲望上好似高人一等，但冇廣東省政協代表等有中港車牌咁實際！
李八方