茶果嶺係藍田同油塘之間嘅一個小山丘，而山腳嘅茶果嶺村仲係一條原居民村，歷史可以追溯到開埠時期。村入面大部份屋都用鐵皮搭建，有啲仲掛住以前酒莊、藥店嘅招牌。
茶果嶺村村口有座天后廟，係全港少數全用花崗岩興建嘅廟宇！廟內香火鼎盛，同時供奉天后、觀音同魯班，以前呢座廟係全村核心地點，兼具義學、公所用途！廟外有一對神石，名為風水卵石，因狀似男性睾丸而得名，相傳有利求子。曾有英籍官員同老婆婚後無所出，點知摸完嚿石一索得男，卸任前仲特登返嚟還神！
點解八方咁清楚？皆因參加咗保護茶果嶺海濱關注組嘅口述歷史導賞團，茶果嶺對出海濱日後有機會變成茶果嶺公園，團體建議將茶果嶺村嘅歷史文化加入公園嘅遊覽內容，畀大家認識多啲當區文化。