新年有乜新願望？對港鐵主席馬時亨嚟講，當然係想盡快過關，除咗係想一地兩檢草案喺立法會審議時如期於今年中通過，自然係高鐵西九站落實一地兩檢後，市民過關可以更快更方便。
肥馬除夕倒數前，特別到港鐵九龍塘、尖沙嘴同金鐘站探訪通宵開工嘅前線員工，仲喺金鐘站同員工倒數一齊迎接2018年，大派社企做嘅曲奇餅，祝大家身壯力健。
佢透露高鐵香港段完成98%工程，只剩小量裝潢同工程，已經準備好第3季通車，當然最終能唔能夠通車都要睇本地立法過唔過到關，佢強調港鐵無plan B，所以其中一個新年願望就係希望一地兩檢快快通過，又再次hardsell一地兩檢「便民便利」，話大部份市民都贊成，若連接唔到全世界最大嘅高鐵網絡，係港人嘅損失喎。