英超2017年最後一場，喺英國當地除夕晚上上演西布朗主場迎戰阿仙奴，亦係值得紀念嘅一場比賽，係兵工廠領隊雲格執教第811場英超比賽，打破咗費格遜爵士保持多年嘅紀錄。不過美中不足嘅係，場波槍手因為被判一個問題12碼，最終被西布朗以1:1逼和痛失兩分，嬲到雲爺爺賽後又狠批球證。
執教811場 破費Sir紀錄
68歲嘅雲格喺1996年開始做阿仙奴領隊，豐功偉績唔少，到除夕夜呢場波終於到達811場嘅里程碑。場波踢到83分鐘先由阿仙奴打破僵局，「山神」阿歷斯山齊士喺83分鐘主射罰球，省中占士麥堅恩令對手擺烏龍，點知去到89分鐘，守將哥林張伯斯被球證甸恩（Mike Dean）吹罰手球判12碼，由積洛迪古斯射入扳平1:1。
雲格賽後好嬲，狠批英格蘭球證水平一路都冇進步過。對於張伯斯被判對基蘭基比斯嘅傳送犯手球，雲格回應話︰「根本冇手球，佢唔係蓄意，冇舉起手，波褲都冇袋，你想球員將對手放喺邊？我真係勁嬲，因為我哋又再見到相同嘅事情。多年前我哋曾經好努力咁去推動球證職業化，但好遺憾，佢哋嘅水平根本冇進步過。𠵱家係時候推行VAR（重播錄像協助執法）。我唔理解既然英超想要成為世界最佳聯賽，當其他聯賽都已經用緊VAR，我哋𠵱家仲喺度等緊。」
施治疑似爆粗問候
雲格嬲到爆，連平時一向斯斯文文嘅門將施治，亦被影到喺完場嘅時候，疑似以粗口「fxxking cxxt」稱呼甸恩。一直有傳聞話甸恩係熱刺球迷，陰謀論睇，佢咪會打壓熱刺死對頭阿仙奴囉。
無論如何，呢場波都係雲格值得紀念嘅日子，前紀錄保持者費Sir，亦透過英格蘭聯賽領隊協會（LMA）發表聲明恭喜雲格：「我為Arsene（雲格）超越咗我執教英超810場嘅紀錄而鼓掌。呢個係一個好夢幻嘅里程碑，需要最高標準嘅奉獻同專業管理先可以達成。我亦好懷疑呢個紀錄永遠唔會被打破。」