政壇2018年度熱爆女新人係……雖然今年啱啱開始，但最終結果大概估到！21歲嘅香港眾志周庭料喺3.11港島區補選出征，如果勝出就係史上最年輕立法會議員，試問又點會唔係今年人氣王？既然係咁，八方當然率先介紹番。除咗愛日本動漫自稱宅女外，周庭查實周身刀，游水吹笛樣樣啱，點只學民女神咁簡單？
偏愛泳池味 稱有質感
「我細細個成日跑嚟跑去，好鍾意游水，兩歲半就去學」，自稱宅女嘅周庭原來係水怪，最叻係背泳同蛙式，小學係校隊，除咗喺校際比賽自由式接力賽攞過第四，亦喺泳會賽事奪過金。原來獨愛泳池水而唔鍾意去沙灘，「泳池嗰種獨有味道、嗰種質感，由細到大我都好鍾意」。
周庭喺嘉諾撒聖家書院讀書時，堪稱入水能游出水能吹……講緊吹長笛箒！話說周庭好鍾意古典音樂，小學到中學都喺管弦樂團吹長笛，但查實小一時想學嘅係小提琴，「覺得好型」，點知課程滿額，長笛班反而有位，「學學吓覺得非常好玩，好好聽，好適合我」，同時仲學埋鋼琴！
至於日本文化，小六開始有興趣，當時係睇日本動漫，亦迷日本明星，大咗就睇綜藝節目，亦開始關心日本新聞，「如果唔係接觸日本文化，我都唔會去學日文、亦唔可以飛去日本受訪。」越大亦越關心香港社會時事，15歲時見到有班年紀相若嘅年輕人成日示威，「咁就上網睇下『國教』係乜、學民思潮搞緊乜，睇完覺得個國教指引真係唔可以接受，亦覺得作為社會公民一分子，都要為社會發聲。」
結果中四時入咗學民，一頭長直髮嘅清純look深入民心，但原來佢小學至初中都係冬菇頭，「成個小丸子咁」，「因為阿媽話短頭髮好啲，大啲先至留長頭髮咋」！而現時喺浸大讀政治及國際關係嘅佢，唔知3.11後，會唔會喺學生外多一重議員身份？
李八方