立法會前主席曾鈺成（Jasper Tsang）自從退下火線之後搞作多多，佢噚日就上載短片，搵埋「3JT」聯盟嘅前財政司司長曾俊華（John Tsang）同自由黨榮譽主席田北俊（James Tien）唱歌籌款，雖然首歌叫《We Three Kings》，但John曾唱歌前仲特別強調首歌冇特別意思，叫大家唔好諗多。
曾鈺成做指揮 提田少開聲
3JT一開始只係排排企唱歌，去到首歌中段，3個人就換上聖誕服飾，而曾鈺成更加帶埋白鬍鬚扮成聖誕老人。唔知係唔係做慣主席指揮人，曾鈺成邊唱邊用手指揮，到田少嗰時更加指住佢提佢要開聲唱㖭。其實曾鈺成上年聖誕亦曾經一人分飾三角，唱聖誕歌為兒童發展配對基金嘅聖誕頌歌節籌款。而今年個籌款方式都好簡單，網民只要畀個like或者share佢個post，每一個like就會以配對方式籌到1蚊。