2012年成立嘅百欣慈善基金5歲生日，噚晚舉行慶祝酒會兼進行支持香港特殊奧運會嘅備忘錄簽署儀式。林家上下都有現身，包括身兼旅發局主席嘅麗新發展主席林建岳，身為基金主席嘅岳少長子林孝賢、擔任基金行政總裁嘅岳少千金林顥伊及岳少母親余寶珠。前財爺梁錦松同行會成員林健鋒都畀面捧場，就連政務司司長張建宗亦親臨兼致辭，話非常認同百欣慈善基金嘅信念，時刻為社會多方面伸出援手。
林顥伊提到爺爺生前堅守「不因善小而不為，只求實幹，不求虛名」理念，希望自己都可以幫助到有需要嘅人，以行動令社會變得更美好。張建宗會後指，取消強積金對沖方案預料農曆新年會有進展，具體內容適時交代，強調政府底線冇變，應取消對沖，但都要顧及營商環境同對僱員嘅保障。