手織聖誕鹿、聖誕老人、聖誕樹同雪人最近空降銅鑼灣名店坊京士頓街同大家賀聖誕。但咁得意嘅裝飾，竟然鬧出「逼遷」風雲。
名店坊Fashion Walk前晚突然喺fb宣佈，聖誕欄杆周日（10日）就要拆卸，超過2萬幾人湧去佢哋個page到用like護「杆」，發起「#一人一like留住聖誕欄杆」行動，恒隆話，11月初開始展示藝術裝飾品，但12月4日收到政府通知要求拆除飾品。
製作裝飾嘅本地手作人La Belle Epoque就爆料，話聽聞係政府部門收到投訴先要求拆卸裝飾。但有份了解事件嘅灣仔區議員楊雪盈就講出事件另一面，佢話政府對保留裝飾開綠燈，投訴唔係爆發事件嘅關鍵，反而係當中有啲溝通誤會，令到一啲程序處理唔到。
指商場遲交資料
路政署話10月11日收到名店坊喺欄杆上加聖誕裝飾嘅建議，19日已表示不反對，但由於裝飾位於公共道路，已多次提醒商場要提交詳細資料同埋聯絡相關部門，商場最終喺11月30日及12月1日提交資料。路政署重申不反對建議。𠵱家聖誕欄杆有得留過年到1月2日，誰是誰非相信無人理啦，打和啦，Super！