第52屆工展會下周六（16日）至明年1月8日舉行，今屆有逾400個參展商、逾880個攤位。
設排隊區派1蚊優惠籌
大會開幕前一晚場外設超級優惠排隊區，派發不同1蚊優惠嘅籌號，入場門券每張10元，兒童、長者及殘疾人士免費入場。
今屆仲分3期推出逾100項抗通脹優惠，其中美的電器推出首日10部原價2,799元嘅1蚊洗碗碟機；南北行鮑參八寶福袋原價2,680元，工展會限量10個1蚊發售；家典有限公司推出20個1蚊電飯煲，原價788元㗎，另外仲有匡橋拓展推出限量3部嘅Contex 50吋4K高清智能電視機，原價8,980元，會場僅售400元。
10位工展小姐噚日就率先登場，仲rap番個freestyle，齊齊甩吓嘴、郁身郁勢hardsell工展會，其中2號佳麗、來自深偉國際有限公司嘅梁綺婷噚日自我介紹時好搶鏡，佢話參賽唔只想幫公司宣傳，仲要為佢母校增光，原來佢喺廠商會旗下中學畢業，多謝廠商會培育佢，話若攞埋工展小姐就意義非凡，「正正係廠商會完美咗我嘅上半生」喎。