研習十九大精神，已經成為親中政圈嘅潮流。鄉議局主席、劉皇發大仔劉業強亦睇準時機，上月中聯同副主席張學明同林偉強，首次帶領40位幾位鄉事會嘅中青年精英，到咗北京中華文化學院參加國情研修班，想大家全方位兼立體地學習中央最新嘅治國理念同發展方向，包括「一帶一路」戰略、十九大精神、中華傳統文化以及綠色GDP喎。
課堂以外，佢哋都參觀咗國家成就展同美麗鄉村示範點等，劉業強話此行獲益良多，仲話內地唔少鄉村，先進過香港嗰啲噃，大讚習大大治下國家發展真係好厲害，參觀一間小學時，更童心未泯學習踩高蹺。其實呢次係鄉議局破天荒舉辦嘅中青年國情研修班，鄉議局都希望呢班新血北上學習後，獲得新嘅啟發。