世界上探明儲量最大嘅阿拉伯國營石油公司沙地阿美（Aramco）正在籌備上市，會喺明年首次公開招股，預計集資額多達1,000億美元（約7,811億港元），預料會係全球歷嚟最大嘅新股上市。港交所同紐約交易所都爭取緊成為沙地阿美嘅上市地點，如果沙地阿美喺香港上市，有分析話港股市值有望增40%。嘩，咁大嚿肥豬肉，特區政府梗係出盡力爭啦。
拉大隊帶周松崗李小加
特首林鄭月娥直情親自拉大隊外訪，日前帶領港交所主席周松崗同埋行政總裁李小加，以及財經事務及庫務局局長劉怡翔等人，一齊啟程到沙地阿拉伯首都利雅得訪問，唔少得嘅梗係要拜會沙地阿拉伯國王薩勒曼、王儲穆罕默德同沙地能源、工業和礦產大臣兼沙地阿美董事長法利赫等一眾當地官員。林鄭席間大sell香港連續兩年嘅上市集資總額都位列全球第一，期望香港同沙地之間加強金融合作，唔知打唔打動到國王歡心？
李八方