2017年就快過去，傳媒機構又開始搞過去一年新聞回顧，特首林鄭月娥噚日出席一個十大新聞選舉，仲即場揀一單係過去一年，佢認為最重要嘅香港新聞，大家估吓佢揀邊單新聞？咪就係佢自己當選特首！
自稱實至名歸
林鄭出席噚日出席由有線新聞等傳媒機構舉辦嘅「十大港聞選舉」，佢要即場選出一單全年最重要嘅港聞，林鄭諗都唔使諗就揀咗自己當選特首做今年最重要嘅新聞，仲解釋話唔係因為自己當選先揀呢單新聞，單係首次有女性當選做特首，已經係重要新聞喇！
而且喺十大港聞選舉嘅候選名單入面，包括有取消強積金對沖、政府投入50億元教育新資源、同埋設立土地供應小組等，都係因為佢當選特首，先會有呢啲新聞發生，所以佢認為，揀自己當選特首做今年最重要新聞，絕對係實至名歸。