當偲嫣都有着落嘅時候，其他政壇盛女嘅終身幸福自然再受關注。民主黨前主席劉慧卿日前接受馬浚偉訪問就提到自己冇人追。
卿姐退休後不時出席唔同電視、電台節目，日前接受馬浚偉訪問，就自爆自己單身超過10年，都冇咩人追，佢都自知「咁鬼死惡，係人都怕咗我喇」！不過若果有人追求，卿姐話都會考慮接受㗎，「同啲好後生或者年紀大，我咩人都傾㗎」。
稱毋須媒人介紹
卿姐接受訪問時就講到自己獨居，佢好興奮咁話，「嘩！真係好到不得了呀！」佢話，一個人住「睇唔睇電視、聽唔聽音樂、着唔着衫」，都係自己決定，自由自在，簡直係前所未有咁正。
咁卿姐會唔會想搵個人陪吓呢，佢就話有人追都會考慮㗎，不過就唔需要媒人介紹，「朋友知道係嘥氣，你估𠵱家100年前咩」，卿姐嘅鬼馬對答搞到主持人馬浚偉笑到收唔到聲。