每年聖誕，香港特首慣常都北上向領導人述職，香港首位女特首林鄭月娥當然亦唔例外，但佢嘅述職日期似乎早過歷任特首，消息指，林鄭會喺下月13至15日北上首度述職。
雖然暫時未正式公佈行程，但據知林鄭會向主席習近平匯報特區最新情況，亦獲總理李克強接見，同時會同港澳辦新主任張曉明會面，相信領導人屆時少不免嘉許祝福一番，繼而都會提出國家畀林鄭嘅「願望清單」，例如近日炒得火熱嘅23條立法問題，關乎國家安全喎，按道理中央明示暗示都會提一提啩！
而林鄭噚日喺一個商貿經濟論壇致辭時就提到，香港受惠於一國兩制，配合法治同良好基建，例如未來一年半內陸續落成嘅港珠澳大橋同高鐵香港段等，可以加強香港同鄰近地區嘅聯繫，而特區同東盟簽署嘅貿易協定，相信可以為香港經濟帶來更多機遇。
仲係山頂選民未更新
至於有人質疑住喺禮賓府嘅林鄭，點解唔係禮賓府所屬選區半山東選民而係山頂選民？據知林鄭雖然遷入禮賓府後已更新住址，但按法例同程序，新住址會喺明年7月嘅正式選民登記冊更新，所以林鄭仲可以喺周日以山頂選民身份喺補選中投票。
李八方