從呢張舊相，大家可以推斷到呢集八方相當年主角，係一位年紀有番咁上下嘅人，就係人稱象哥、現年68歲嘅民建聯立法會議員黃定光喇。大家平時見到嘅象哥都係聲大大、鬧民主派嗰陣凶神惡煞嘅樣，原來佢話爸爸比佢更加惡，唔通佢係喺爸爸身上偷師？
孻仔唔怕嚴父「省人黃」
象哥係家中孻仔，對上有兩個家姐同埋兩個哥哥。雖然喺60年代做過廣東省人大嘅爸爸黃佩球素有「省人黃」外號，意思即係成日「省人（鬧人）」嘅人大，喺屋企又係嚴父一名，但一如唔少孻仔，象哥細個嘅時候都唔係十分怕父母。
象哥幾歲嘅時候就睇住爸爸整機器，順便幫手遞吓螺絲批、士巴拿等工具，因而愛上搥搥揼揼嘅嘢，到今時今日新填地街、鴨寮街都係佢最鍾意行嘅街。
到70年代加入爸爸公司做嘢，佢都係由低做起，執倉、洗廁所都要做，爸爸仲同其他世叔伯講明唔使就住佢，不過佢亦相當上進，當年未學過會計就要睇數，於是報明愛夜校讀會計；到公司嘗試搞電腦化，佢又係唔識，惟有再返明愛讀電腦，相信係咁獲爸爸信任，漸漸子承父業。
雖則象哥不時都提到爸爸好惡，但嚴父好錫佢哋幾兄弟姊妹，不時一家人四圍遊，有張舊相見到，1951年得兩歲嘅象哥就去咗紅梅谷郊遊，象哥爸爸仲揸架開篷車載佢哋遊車河。