除咗噚日嘅中西區議會補選，大家更關注嘅，當然係明年3月11日，涉及3個地區直選同一個功能組別選舉嘅立法會補選。八方都報道過，建制派對3.11呢個日子好有意見，皆因撞正北京人大及政協兩會，百幾位人大政協飛嚟飛去都小事，喺中央嚴禁「走堂」嘅要求下，若然建制派集體請假，中央顏面何存？所以建制派紛紛向西環同北京打小報告，希望力勸特區政府將補選改期。
聽聞特首林鄭月娥都頂得好行，向上痛陳利害，解釋呢個日子係選管會獨立地作出嘅決定，而選管會唔會作任何政治考慮，若然因建制派不滿而改期，對「兩制」影響極大。
據知建制派就諗計仔，睇吓點可以兩全其美。嗱，人大政協3月會期有日「休假日」，如果休假日定喺3.11，咁咪唔使請假，又可以返嚟投票囉？翻查資料，今年人大嘅休假日一樣係3月11日喎！
其實選管會主席馮驊噚日已經講明，3.11舉行嘅立會補選正籌備場地同人手安排。