上周六壓軸重頭戲馬德里打吡，兩隊都冇着射門鞋，最終皇家馬德里作客同馬德里體育會互交白卷，創出12年來首次喺西班牙首都打吡冇波入。今場皇馬只有五射三中，仲有隊長沙治奧拉莫斯畀人踢爆鼻要換走，賽後更傳出基斯坦奴朗拿度（C朗）向隊友大發雷霆；反觀榜首嘅巴塞隆拿，憑蘇亞雷斯省兩粒破入球荒，作客3:0大勝雷加利斯，同皇馬已經拉開10分差距。
C朗今季55次射門入一球
今場皇馬派出艾斯高支援C朗同賓施馬，而馬體會就派出安祖哥利亞配搭基沙文攻堅，兩隊前線表面上星光熠熠，但踢落卻冇嚟神氣，全場加埋得八次射門，馬體會仲要冇一球中框。不過冇波入唔代表場波悶嘅，話晒今場係打吡戰，兩隊依然踢到飛沙劈石，馬體會四名後衞食晒牌之外，皇馬隊長拉莫斯仲喺上半場飛身衝頂時，被對方守將盧卡斯靴南迪斯踢爆鼻，半場就退下火線。不過，球員點盡力都好，贏唔到波又入唔到波，皇馬球迷好難唔責怪喎。
特別係今場掛帥嘅C朗同賓施馬，都畀人有種「廉頗老矣」嘅感覺。特別上半場15分鐘皇馬一次反擊，C朗本來有單刀機會，點知俾32歲嘅老將桑法蘭托里斯追到，仲踢走埋個波；而截至噚日為止，原來C朗今季已經喺西甲完成咗55次射門，但只係入得一個波，效率奇低。賽後仲要傳出C朗鬧隊友唔爭氣，話佢哋繼續演出不穩就無法捧盃，不如檢討吓自己先嘞。而全場消失喺對方圍牆之下嘅賓施馬，更被著名足球網《WhoScored》評為皇馬全場表現最差球員，得6.5分。加埋經常受傷嘅加里夫巴利，今季BBC組合只係入得四球，導致皇馬首12輪聯賽只有22個入球，比起上季同期足足少咗12球。
阿蘇省兩粒助巴塞放離10分
反觀榜首嘅巴塞就有「哨牙蘇」強勢反彈，個人梅開二度，加上後備上陣嘅荷西保連奴喺補時埋齋，助球隊贏雷加利斯3:0；值得一提嘅係，保連奴今季已幫巴塞射入四球，同BBC加埋嘅入球一樣。睇嚟皇馬想追番上嚟，先要解決BBC嘅低迷狀態！