一年一度嘅樂施毅行者活動噚日喺西貢北潭涌舉行，由行會成員兼毅行者籌委會主席陳智思等主持起步禮，今年毅行者有成1,300隊、一共約5,200人參加，各隊分5個時段出發，最早8點喺西貢起步，最快到達終點嘅冠軍級人馬就係尼泊爾隊伍「AWOO Team Nepal」，佢哋大約喺晚上8時到達位於元朗嘅大棠度假村終點，以12小時01分嘅速度衝線，完成咗全程100公里嘅麥理浩徑。
今年毅行者繼續有不同人士參與，包括有視障、聽障人士組成嘅猛龍隊、義肢毅行者隊伍同第一次參與嘅外傭女子隊，而今年全隊年齡最高嘅隊伍花甲威龍隊，4人就加埋成266歲，即係平均年齡有成66.5歲，認真犀利。