身兼香港基本法教育協會會長嘅立法會議員梁美芬熱愛《基本法》就係人都知，原來呢段情由20年前已經開始。鼠王芬噚日出席一個《基本法》研討會時就大爆，自己20年前陀住細仔時，即1997年7月，第一次幫手舉辦《基本法》研討會，當時有朋友見佢臨盆在即叫佢放棄，但佢仍然堅持，所以《基本法》就好似佢個仔一樣，一樣咁愛，一樣有生命力。
鼠王芬致辭時就形容，《基本法》今年20歲生日，佢細仔亦係20歲，當時佢一邊懷孕，一邊舉辦《基本法》研討會，所以《基本法》就好似佢個仔一樣有生命力。佢對於《基本法》嘅期望，同對自己個仔一樣，希望《基本法》可以代代相傳，呼籲大家珍惜它、愛護它、尊重它、理解它，永遠令《基本法》成為國家嘅掌上明珠。鼠王芬深情演繹，肉麻過結婚誓詞，聽到八方全身起雞皮囉。