薯片叔叔曾俊華早排因為唔收人工主持商台同港台節目，俾特首辦屈佢冇事前溝通、又唔申報，搞到佢都有啲火氣，主動出嚟澄清件事，不過似乎冇乜影響佢做節目心情，而且似乎玩得相當過癮，噚日商台係fb就po咗條薯片叔叔答聽眾來信嘅短片，佢不改冷面笑匠本色，答聽眾問題變問聽眾問題，仲連黑人問號都出埋。
「究竟方丈係邊個？」
條片一開始，薯片叔叔已經唔記得自己個節目名，問身邊工作人員，我哋做咗4集乜嘢呀？佢明明做咗5集節目，又係咁話自己做咗4集。到答聽眾問題，有聽眾話節目入面處理好多敏感問題，希望佢唔好再觸及呢啲敏感問題，事關方丈份人係好小器嘅。
呢個時候薯片叔叔竟然一臉疑惑咁問：「咁究竟方丈係邊個箒？」畫面仲出現一個薯片叔叔嘅黑人問號樣，認真搞笑。
之後又有聽眾話要點歌，想點首《你沒有好結果》畀特首林鄭月娥聽，雖然早排特首辦係咁隊住薯片叔叔，但佢都算大方，佢話：「唔好咁啦！不如我哋遲啲播首《快樂老實人》啦！」最後薯片叔叔話，好多謝好多聽眾話佢個節目好聽，希望聽眾繼續支持個節目。
薯片叔叔擺明繼續做商台節目，佢同港台做主持個節目亦冇受早排申報風波影響，一連10集嘅《香港故事－修復時刻》會喺今晚港台電視31播出，希望節目出街後，薯片叔叔唔會又俾特首辦煩佢啦！
李八方