早排去以色列考察嘅前立法會議員劉慧卿，因為國泰取消航班搞到佢滯留當地兩天，當時激到卿姐喺fb上載dislike手勢抗議，鬧國泰安排失當，事後國泰雖然有道歉，又向卿姐送上國泰禮券補鑊，但卿姐似乎未下到火，日前再寫封信去國泰投訴，而且仲話明係代表一班同樣唔滿意國泰服務嘅乘客表達不滿。
今次卿姐封信除咗寫晒滯留以色列期間，國泰出現嘅種種問題外，連其他俾國泰常客批評嘅問題，亦一併鬧埋，包括極之難食嘅飛機餐，卿姐話佢發文後，好多搭過國泰嘅網民都留言話國泰服務唔掂、管理又差，所以卿姐希望國泰全面檢討，畀番個答覆佢。