實政圓桌立法會議員田北辰、民建聯立法會議員劉國勳日前就率先引述運輸署消息，大爆已經就討論多時嘅九巴月票計劃獲運輸署「開綠燈」，兩個人都喺九巴公司同運輸署公佈前已經同傳媒放風，真係跑贏成條街㗎，不過呢單嘢就引起其他黨派唔多高興，仲將矛頭指向九巴同運輸署。
有民主派議員噚日就同八方大呻，話呢單嘢不論泛民同建制都有跟進，最後俾二少同劉國勳攞彩，明顯唔係自己唔夠勤力，而係署方厚此薄彼，質疑署方吓吓只係向個別建制派議員放水，斥署方無規無矩兼禮崩樂壞，名副其實「大細超」。該民主派議員仲話，署方唔係第一次放水畀劉國勳，之前將小巴座位由16座只增加至19座，亦由劉負責公佈，質疑劉變咗運房局發言人定係九巴代表，又質疑點解九巴放水畀佢公佈喎。