民主派立法會議員喺立法會將有全新組織，由香港本土毛孟靜、獨立朱凱廸、街工梁耀忠、人民力量陳志全將於噚日下午喺立會公佈合組「議會陣線」。
不過，呢個組織其實早喺4位立法會議員被取消資格前已醞釀，所以原本有7個人，包括社民連梁國雄、眾志羅冠聰、小麗民主教室劉小麗，但當時由於官司未有結果，所以成立聯盟一事就拖住，後來佢哋仲被DQ，結果組職聯盟一事喺一個月前先重提，到噚日正式成立，不過佢哋講明，聯盟只係喺議會行動一致，投票就不會綑綁。
民主黨、公民黨、專業議政、議會陣線呢四大民主派板塊，已包含晒所有民主派立法會議員，只餘工黨張超雄未有「着落」。超雄話，由於佢仲有工黨呢個身份，所以唔加入議會陣線，即使加入，都要同工黨討論咗先。佢話即使佢唔係議會陣線嘅成員，但相信日後都會同佢哋一齊行動。