九龍西、新界東補選七國咁亂，聽聞青年新政游蕙禎近排接觸過已退出民主黨嘅南區區議員區諾軒，問吓由佢出戰九西補選有冇得諗。區諾軒話，佢自己真係冇咩意願出戰，又話自己同九西就係好唔關事，所以唔好搞佢嘞。
不過，民主派喺兩區補選嘅出戰陣容，好快就會明朗化，因為嚟緊呢個星期六，各有意出選嘅政團，都要向民主動力表明參選意向，組織派出嘅具體人選可容後交代。九西方面，參加組織要畀5至6萬元搞初選，新東方面，因為幅員較大，參加組織要畀約10萬元出嚟。
民主動力召集人趙家賢話，希望下周可向外交代民主派整場補選嘅細節，佢話，𠵱家民主動力仲係相當努力咁協調各持份者嘅關注，希望搞好呢場初選。兩區補選，民主派之間咁多利害關係，八方就話由本身係調解員嘅趙家賢做統籌就最啱。