因不滿民協馮檢基打算再參加九西補選、而退出民協嘅九龍城區前議員莫嘉嫻，本周初正式「轉會」加入民主黨。莫嘉嫻今次連區都轉埋，由九龍西跳去九龍東，跟隨民主黨立法會九龍東議員兼該黨主席胡志偉搵食，成為志偉嘅立法會辦事處職員，幫志偉睇住九東嘅地區工作。轉會又轉區，莫嘉嫻難道劍指2020年嘅立法會選舉？嘉嫻同志偉未有斷言說不，只係話言之尚早。
莫嘉嫻加入民主黨一事，先係由該黨嘅黃碧雲多番游說，之後再由志偉親自出山，最終於本周初成事。嘉嫻話，由於佢想有新發展同埋屋企人支持，故決定轉區去九東，雖然佢喺九龍城服務多年，但其實佢係喺九龍東土生土長，現居都係九龍東，所以轉區並非好大問題。
話出戰九東言之尚早
睇番民主黨喺九龍西嘅人腳，真係好多年輕人等住上位，所以九龍東不失為新人嘅另一個選擇。
咁係咪準備接棒，繼承胡志偉嘅九東席位？嘉嫻話，真係冇諗過咁長遠，𠵱家慢慢做起，將來嘅事一切隨緣。
志偉亦話，𠵱家講莫嘉嫻係咪會出戰九龍東，實在係言之尚早。不過，志偉讚賞莫嘉嫻做地區工作經驗豐富，相信建制派見到佢落嚟，都會「重點招呼」佢，不容忽視。
睇番民協，佢嘅九龍中支部可謂幾近瓦解，任國棟、蕭亮星、黎廣偉、楊振宇、莫嘉嫻，統統都曾經係民協嘅新星，結果一個一個咁離開。睇嚟民協真係要諗吓計，睇吓點樣留住人啦。
李八方