年初巴西嘅進口肉類出現問題，令到大家都好驚食到「黑心巴西肉」，但港人善忘，相信唔少人已經食番，隨時忘記埋巴西肉曾經出事。有立法會議員就睇中呢個黃金機會，提出「考察巴西」。民建聯立法會議員陳恒鑌同飲食界自由黨張宇人，去信立法會食物安全及環境衞生事務委員會，建議委員會出年暑假前往巴西，「深入了解當地出口肉類及禽肉進行安全檢測工作」。
巧感動！兩位議員關心市民福祉，喺巴西肉今年初3月出事，超過半年後，到今時今日先至提出明年走轉巴西，做事極有效率，絕無拉布。邊度有事，議員就去邊度考察，但平日好多內地食物都出事，何解議員唔提出返大陸考察嘅，以深入了解內地出口肉類嘅安全檢測工作呢？究竟想趁暑假用公帑走轉巴西，定係真心關注巴西出口肉類嘅問題，大家都應該好清楚。