係人都知特首林鄭月娥想噚日立法會盡快過一地兩檢議案，所以當去到動議縮短一地兩檢議案修訂表決鐘時間，民主派就梗發言反對，原本民主派理由來來去去三幅被，但公民黨郭家麒醫生噚日唔知係咪唔想咁悶，要搞搞新意思，提出以醫學理由反對縮短表決鐘，點知引嚟主席梁君彥質疑，郭醫生係咪想懷疑男議員嘅「能力」？
本身係泌尿科醫生嘅郭醫生噚日發言時話，從醫生嘅角度反對縮短表決鐘時間係好合理，佢話因唔少男議員年紀都唔細，通常去廁所時間會比較長，梁君彥一聽到就反問郭醫，佢係咪懷疑緊男議員嘅能力？
此言一出立即引嚟一眾議員大笑，點知郭仲答一句：「主席，我好短嘅啫！」結果再令大家笑到唔停！呢個時候郭醫生先補一句，佢只係話自己發言好短，千萬咪亂諗！