12月聖誕新年假如果想留港玩足一日，似乎得主題樂園最方便。睇番今年安排，迪士尼話會搞特備米奇聖誕舞會，海洋公園呢邊就話玩科技，話同Samsung合作推出全港首個虛擬實境（virtual reality，VR）過山車喎。八方問過，到時大家可以戴住個VR頭盔、玩被外國過山車專家譽為最美過山車嘅越礦飛車，同步感受視覺、體感雙重刺激。
不過，如果戴住個頭盔，查實係咪乜港島靚景都睇唔到？海洋公園就話，到時個VR頭盔會帶畀大家驚險刺激嘅旅程，好似係穿梭熱帶雨林、沿亞馬遜激流漂游同去深海潛水！可惜啊，暫時樂園未公開VR畫面，究竟冬天玩過山車穿梭熱帶雨林係乜感覺？八方都要等到12月中先試到。