公民黨黨魁「岳少」楊岳橋下月擺酒，理應人逢喜事精神爽，點知噚日朝早8點幾揸部黑色jeep，趕赴一個早餐會議時，沿中環添華道出夏愨道時，喺路口同一架的士碰撞。好彩就冇人受傷，係架的士車尾俾岳少車撞凹咗少少。岳少同八方講，自己今年犯太歲，原本已事事小心，點知到年尾都要撞車，惟有當破財擋災。
𤓓住同路過乘客揮手
岳少話，噚日朝早揸車由小路出大路，冇為意前面的士未郁，結果撞到人哋車尾，仲話今次係佢喺外國讀書返港近10年，第一次喺香港撞車。而一向人氣爆燈的岳少仲話，雖然係佢撞到人哋，但被撞的士嘅乘客好客氣，笑住同佢揮手，唔少的士、私家車同巴士乘客都認得佢，好多人喺車上同佢打招呼，佢只好辳住咁揮手回應，同大家講聲唔好意思。之後佢同的士司機商議後賠錢，事後亦按法例到差館備案。
岳少又話佢屬雞，知今年犯太歲，年頭已去咗攝太歲，噚日朝早揸車前睇咗網上一幅范國威畫嘅狗年生肖年曆，正慶幸今年冇乜遇過大鑊嘢，點知即時中招，惟有當破財擋災喇！不過佢笑言，自己揀今年結婚，就絕對同坊間話犯太歲要沖喜無關。佢選擇今年結婚，純粹因為雙方覺得時間適合，話早前經立法會主席梁君彥宣佈擺酒消息後，令向來比較低調的岳嫂Eve都有啲壓力，因要諗吓當日要着乜嘢靚衫喎。
李八方