特首林鄭月娥話要推創科產業，其實香港大專院校不時有唔少創科研發成果公佈。好似港大噚日公佈成功研發廉價環保防水防油物料，只要將呢啲特製物料覆蓋係其他物料上面，就可以有防水同防油的效果，日後可以用嚟做衫，甚至用係軍事用途。
負責呢個研究項目嘅港大機械工程系博士朱平安話，呢種物料意念係來自跳蟲，因為跳蟲棲息係泥土入面，經常會遇上雨水淹浸，所以進化出能抵抗泥土摩擦、又有良好排水能力嘅角質表皮，研究團隊就係模仿跳蟲表皮結構，設計出呢種耐摩擦又防水嘅物料。香港大學工程學院機械工程系教授王立話，呢種物料如果大量生產，每平方米只需港幣7毫至1.3元，比其他防水物料平好多。