近年香港嘅惜食風氣越嚟越盛，由梁錦松做主席嘅惜食堂搞咗唔少推廣工作，應記一功，近年惜食堂不時有新搞作，好似佢哋噚日開幕嘅「粒粒皆辛館」展館，就係全港首間融合惜食及關愛嘅實體展館，希望令市民知道香港食物浪費同貧窮問題嘅融合式議題展館。
阿松話，雖然惜食堂至今回收咗超過400萬公斤仍可食用嘅剩食，生產超過470萬份熱餐同食物包，令唔少人受惠，但其實香港每日廚餘逾3千公噸，惜食堂回收嘅不足百分之一，所以佢哋成立呢間以惜食同關愛為主題嘅粒粒皆辛館，希望令參觀者了解香港食物浪費同長者貧窮問題。出席嘉賓教育局局長楊潤雄就話，佢希望學生可以透過參觀展館，培養珍惜習慣，對佢哋將來嘅人生會好有用。