社創基金同香港青年協會最近合作舉辦社創短片資助計劃，資助18至35歲嘅後生仔，為10個獲社創基金資助嘅創新項目拍短片，希望培育年輕人拍片才能之餘，亦令更多人知道年輕人做緊好多好事，仲有柳俊江擔任星級紀錄片顧問。
其中一條片係講全港首間銀髮模特兒中介公司，訓練同幫助銀髮模特兒成為企業代言人，希望改變大家對老齡社群嘅傳統印象。查實香港人口老化，如果有更多銀髮模特兒，同聲同氣，更能接觸到目標市場。而查實銀髮族同年輕人，好多時諗法都差唔多，擔心做模特兒係會俾人呃，但又好鍾意扮靚擺pose，等大家畀like。
睇番呢十隊拍攝隊伍嘅背景，有曾獲本地大專院校獎項嘅最佳導演，亦有人出戰台灣屏東國際旅遊電影節並獲最佳剪接，另有人曾經同黃修平導演合作拍短片，來頭絕對唔細！